一日讀兩間幼稚園是虐待孩子！
教育隨筆╱趙榮德
「應否讓孩子一日讀兩校，上午讀免費幼稚園，下午讀要交費的私立幼稚園？」有家長問。
「萬萬不可！」我斬釘截鐵的答。
「為何不可？」家長鍥而不捨的追問。
「因為一日讀兩校，實際上是虐待孩子！」
「虐待孩子？趙Sir你言過其實啦！」家長答，「我係為佢好呀！我上午送佢讀免費幼稚園，等佢學多知識，下午讀私立幼稚園，等佢學好啲英文，咁樣學貫中西，將來至容易考到名小學呀！點算虐待孩子喎！！」
「你話一日讀兩間學校是為孩子好，其實係一廂情願。要一個三歲小朋友上晝返三個鐘，下晝又返三個鐘，一日返六個鐘已經好過分。你知唔知一個三歲小孩每次可以集中精神幾耐？」
「半個鐘？」
「冇。你睇佢平時玩玩具便知，至多20分鐘。佢每一節只可以集中20分鐘，你要佢一日集中六個鐘頭，你話佢邊會有心機學習！此其一。」
「但係返全日制嗰啲小朋友唔喺一樣都要挨咁耐？」家長不服氣反駁。
「其實正常的幼稚園應該係半日返三小時，不過香港大部分爸媽都要返工，所以迫住要送子女返全日。但全日與一日讀兩校有以下不同：（一）全日制中午時段在原校進午膳，食完之後又午睡半至一小時先至上課，而且下午大多數幼稚園不會再教書，只集中在唱歌、跳舞或繪畫，與一日讀兩校有天淵之別。（二）如一日讀兩校，小朋友便要在中午的一小時內，換校服（因上、下午校的校服不同），進午膳，趕搭車返學。我識得一個媽咪迫個女讀兩校，迫左半年，卒之有一日個女在公園食咗半碗飯，嘔吐大作，女兒氣若游絲的對媽咪說：『媽咪，我頂唔住啦！我唔想返學啦！』媽咪才如夢初醒，知道自己迫到個女病，而且唔中意返學，以上呢個活生生嘅例子清楚指出，個阿媽以為係為個女好，但其實佢係似雞農，天天叫個女張開口，把『知識』塞入肚中，你話佢係咪虐待個女？其實正正經經讀好一間幼稚園，一樣可以入到好學校㗎！」
「明白，明白，趙Sir你講得好啱，多謝指點迷津！」家長答。
趙榮德
現為輔導教師協會顧問，曾任喇沙書院副校長。關心香港教育，於《明報》、《星島日報》、《公教報》撰寫專欄，出版著作甚豐，有《不一樣的家長》、《趙Sir教英文》等。
電郵：chiu24@gmail.com
版權所有©基督教香港信義會社會服務部