港華轉直資的原因「為己多過為人」
教育隨筆╱趙榮德
之前傳統名校香港華仁書院擬轉直資的消息，在各大報章頭條均有報道，不少家長都對這間樸素校風的、名人輩出的學校竊竊私語，以下是兩位對港華有認識的家長的對話。
家1 ─ 反對者 家2─ 贊成者
家1：港華無風起浪，辦得好地地，竟然想申請由補助轉直資，唔知為乜？
家2：為紀念創校一百週年，為財政自主，同埋為進一步發展學校理念囉！
家1：我唔同意，香港華仁素來以樸實無華出名，而直資卻是貴族學校，將樸實無華改為貴族名校絕對是為金錢、為財政自主要出賣學校的靈魂，是離經叛道、天地不容的！
家2：嘩！你想多咗啦！港華呢次是有備而戰，佢地喺2015年成立一個「創校百週年組」，由校監周守仁「孭飛」，做咗年半嘅可行性研究，分析過由補助學校轉做直資學校嘅利弊、研究過與直屬小學脫離直屬關係嘅好壞，現在覺得時機成熟，先至公諸於世，開始收集持份者嘅意見。
家1：我覺得成事機會不大。一來因為社會仍然對直資抱負面態度；二來因為最後一間成功轉直資嘅協恩中學，已經係五年前嘅2012年啦。喺2013年申請嘅聖保祿中學與聖士提反女子中學都相繼被「Ding」，可能教育局唔再批准傳統名校轉直資啦！
家2：未必。果陣政府唔批，因為兩間學校都有持份者反對：一為家長、一為學生，而家港華靜雞雞做，家長又似乎冇乜反對聲音，我就話機會好大喇。家長最大反應，係轉直資就唔可以有教無類，只收有錢仔，其實港華的學生，有不少已經屬有錢一族，轉直資除咗灣仔區，重可以收其他窮的區，咁樣就更加有教無類啦！
家1：你打橫來講，窮區的學生冇錢交學費呀？
家2：直資學校規定要將10%收嘅學費撥出來作獎學金喎。
家1：10%咁少，都算推廣有教無類精神？絕對係自欺欺人。
家1：事實如此，你唔信都冇法。
家2：除非港華轉直資後，肯撥30%學費出來作獎學金，否則，用有發展、有教無類呢個籍口來轉直資，幾難有人信！
趙榮德
現為輔導教師協會顧問，曾任喇沙書院副校長。關心香港教育，於《明報》、《星島日報》、《公教報》撰寫專欄，出版著作甚豐，有《不一樣的家長》、《趙Sir教英文》等。
電郵：chiu24@gmail.com
版權所有©基督教香港信義會社會服務部